SHILLONG: Robibar saloni Sombar salona konta 24-ni gisepo Meghalaya a·dok gimiko sak 336 manderang COVID-19-ko man·daptaiaha.
Sombar salo COVID-19 man·dapgipa sak 336 manderangko channe da·o Meghalaya a·dok gimiko COVID-19 man·e dongenggiparang gimik sak 4378 gapengaha aro ia apsan salon sak 8 manderang COVID-19 man·e siangdapahani gimin a·dok gimiko COVID man·e sianggiparangara gimik sak 827 gapskaengaha.
Sombar salo positive ong·gipa sak 336 manderangoni sak 6-de East Garo Hills-o, sak 15-de East Jaintia Hills-o, sak 159-de East Khasi Hills-o, sak 11-de North Garo Hills-o, sak 48-de Ri Bhoi a·jao, sak 3-de South Garo Hills-o, sak 14-de South West Khasi Hills-o, sak 18-de West Garo Hills-o, sak 13-de West Khasi Hills-o aro sak 49-de West Jaintia Hills a·jao ong·a.
Konta 24-ni gisepo COVID man·e sianggipa sak 8 manderangoni sak 7-de East Khasi Hills-o aro sak 1-de West Jaintia Hills a·jao ong·a.
Ia apsan salon gimik sak 508 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 43,578 gapskaengaha.