TURA: Adita salrangna skang, Haryana a·dokni hospital damsao doctor aro nurse-rangni simsakgijani a·sel A·chik me·chik saksani siangani ja·man uni adagipaba kragija obosta siangna nangaha ine Garo Hills-ni NGO-rang matnangatenba, iani bidingo ning·tue am·sandianirangko dakenba, dos donggipa manderangni kosako rakbatgipa ja·kurangko de·china Haryana sorkariko didiataha.
Ia a·selni bidingo Association for Democracy & Empowerment (ADE)-ni president Dalseng Bira Ch Momin-ba suk ong·gijaniko parakatengon, Rose Sangma minggipa A·chik me·chik aro uni adagipa Samuel Sangma-ni sianganina Haryana hospital-ni doctor aro nurse-rangko matnangatenba, ia a·selni bidingo am·sandie, dos donggipa manderangko kakket bichalona rimbachina Haryana sorkariko didiataha.
“Samuel Sangma-ni ong·na amgija sianiko ning·tue am·sandichina aro dos donggipa manderangna rakbatgipa sastirangko on·china ADE dabienga. India a·songni gipin bakrango salgro salaram jolni manderangko mikchepani aro kal·ake roani ian gital katta ong·ja maina skangonin salgro salaram jolni manderangko a·songni gipin biaprango indake kal·ake rona jotton ka·enga,” ine ADE-ni president parakataha.
Sianggipa Samuel Sangma aro uni nogipa Rose Sangma-ni nokdangnaba ADE, kalimchakpaaniko parakataha.
Ia a·sel ong·anio jak donggipa manderangko rim·na man·na gita Nagaland aro Meghalaya sorkarikoba, iani bidingo jako ra·e Haryana sorkari baksa agangrikskachina gitaba ADE mol·molataha.
Apsan daken ia a·sel ong·aniko Williamnagar-ni GSU East Zone aro FKJGP Eastern Circle dolrangba raken jegalataha aro ia a·selni bidingo ta·raken am·sandienba dos donggipa manderangna rakbatgipa sastirangko on·china dabiangtokaha.
“Haryana-ni hospital-o Rose Sangma aro Samuel Sangma-ko kragija bewalo jakdangdikani a·sel, uamang janggitangtangko gimaatna nangahani gimin chinga duk ong·a aro chinga iani bidingo maming dakchakanirangko on·pana man·jagenchimoba duko ga·akenggipa nokdangni manderang baksa chingni apsan bakrimaniko on·pana nangnika. Ia a·selni bidingo kakket bichalko ka·e dos donggipa manderangko sasti on·na nangchongmota,” ine GSU East Zone aro FKJGP Eastern Circle parakataha.
Iani bidingo GSU east zone aro FKJGP Eastern circle, chubatgipa gadangona lekka sedoate, salgro salaramni pilak dilgiparangkon apsan ku·rang on·china mol·molataha ineba dolgni NGO-rang parakataha.