Khalu Gare Mahari, a·kingo koela cho·na niam gri krong songdraaniko jegala

SHILLONG: West Khasi Hills a·jani Shallang police station-ni ning·o ga·akgipa Khalu Gare Maharini a·kingo, mahari gimik baksa mamingkon u·iatchenggija aro tik ka·chenggija ma·sina man·gijagipa manderang ‘scientific coal mining plant’-na chong·motan sorkarni on·gimin niam gita koela kulina ine sima-ari sotna krongrang songdraengako Khalu Gare mahari gimik raken jegalataha.
Adita sak songni manderangni u·iatako man·e, songo-noko donggipa Gare Mahari gimik chong·motan nokmechik aro nokni dedrang re·anggipa Sombar sal, June 28, 2021 tariko am·sandie ra·angahaon, mahari gimik aro songo-noko donggipa nokma, sordar ba mahariko dilenggiparango maming u·iatchenggija, Khalu Gare A·kingni ning·o ga·akgipa A·sak a·bri ja·ret ba a·bri ja·pao niam gri sorok joljol koela mining pant-na sima-ari sotna miksonge krongrang songangako nikeahaon manari gimik jagokmanpilahachim.
Batanggimin chango, songni nokma ba agent-rangko man·chape an·tangtangni man·gnina mikpakma nianichi mahari gimiko ma·siatchenggija Khalu Gare Maharini a·kingo donggipa A·sak A·brioniko sorkarini niam gita koela cho·china ine badiaba company ba agency-ni jako on·ahachim.
Indiba iani bidingo songo-nok aro chel·a-tu·ao donggipa mahari gimik changgnina kingking tom·e chanchirimahaon, skang chasongoni Gare Maharini ma·ambi aro pagitchamrangni rasong gnangbee man·e donangpagipa a·king-goreko sorkarini niam gita koela cho·china company ba agency-ni jako on·genchimode bano song-nok rokuna, bako a·ba cha·kuna aro bano bagan-bari dake cha·kuna, chiring-chisik signok, buring-bolgrim, a·bri tangsimgiparang dongjawajok ine mahari gimik on·jaha aro mikkangchiba mahari gimik meli-ma·gape krim-kro kamko ka·jaskalde koela kulichina company ba agency-ni jako on·jawa ingipa niamko ra·gate jinma tom·e chanchirimanio jakrani jakko songe ra·chakangmanaha.
Uarangsan ong·aigija, Gare Maharini ma·ambi-pagitchamrangni rasong gnangbee Meghalaya-ko jakgitel man·a skangoni man·e donangpagipa Khalu Gare Maharini a·kingara, Khalu songo atchie dalbagipa Gare Mahari sakantini a·king-goreba ong·chongmota, ia a·dok-chigako skango sianggipa sagi Shri Doiring Sangma aro Smti, Sangrai G. Marak mang nirokangaha aro uamangni ja·chong uni chawari demechikrang, Shri, Rementhon A. Sangma aro Smti, Sia G. Marak mangni nokma ong·e, uni chawari demechik, sadu saderang aro mahari gimikko dilenganichi da·ona kingkingba a·king-goreko name aro krae nirokangpaenga.
Khalu Gare A·kingara maharini membor saksa-sakgninisan ong·ja, indiba mahari gimiknin. Iano angan nokma ba agent, angasan a·king goreni nokgipa ong·a ine chu·gimik bilko a·kange ra·na man·ja aro a·king-goreo donggipa gam-jin, chong·motan koela-rong·chun, bol-wa·arang aro uandakgipa a·kingni gipin gamrangko skatang pale-sule cha·na man·jawa. Iarangko dakna skangba mahari gimik tom·e chanchirimchengesa maharini membor-rang sakantian ku·cholsan kusi ong·e ba meli-nangrime kam ka·osan jekoba dakna man·gen.
Unigimin, chinga Khalu Gare A·kingo songdong-achagipa, songjapang-nokjapang Gare Mahari gimik, mahario mamingko u·iatchenggija aro ching baksa jedakgipa koela mining kuliani bidingoba tik (agreemant) ka·chenggija chingni Khalu Gare A·kingo skatang dake (Scientific Coal Mining Plant)-na sima-ari sotna miksonganio cement-chi tarigimin krongrangko songako raken jegalata.
Uandake je company ba agency-ba ong·china ching mahari gimiko ku·mong-nangrimchenggija maharioni mitam membor-rang an·tangtangni namgnina miksonge koela mining kulina agreement (tik) ka·gimin donggenchimode, uarangko bakbakan ra·galpilchina gitaba raken didiatenga.
Mahari gimik baksa apsan ku·mong-nangrime ba kusi ong·e jekoba dakjagenchimode, chinga uarangko ra·chakjawa aro sia kripba chingni a·king-goreo scientific mining plant-na on·chongmotjawa. Maina mahari gimiko u·iatchenggija mitam manderangni an·tang namgnina dakako ja·rikgenchimode maharini gisepo dal·bea ma·sisretani, an·chi-pari nikgrikanirang dongchongmotgen ine chinga Khalu Gare Mahari gimik mikrakaniko on·atenga.