SHILLONG: Meghalaya a·doko pilakni gitan neng·nikanirangko man·na nangengoba, lekka porani gadangko tang·doatna sorkari jotton ka·enga aro rakbee kamrangko ka·anichi da·o a·doko dam 600 baten skulrangko kulina man·aha ine a·dokni Education Minister Lahkmen Rymbui parakataha.
“Chinga man·a dipetde a·doko lekka poraniko tang·doatna jotton ka·enga aro uandaken 2017-18 bilsirango dam 584 skulrang dongaoni dam 610-ona aro ia bilsiode skulrangko dam 649-ona bariatna man·aha,” ine Education Minister parakataha.
Meghalaya a·doko bilsiantian skulrangko bariatna jotton ka·enga indiba a·doko lekka porako tang·doatna gita sorkari manderangni bakrimanikoba nangenga ineba Rymbui aganaha.
Meghalaya a·dokni education system ba lekka porako on·ani bewalrang a·songni gipin a·dokrang baksa dingtanggrika ine talatangengon, a·songni gipin bakrangode sorkari aro private skulrangsan dongbataia indiba Meghalaya-ode dingtang dingtang rokomni skulrang donga aro sorkarini dakchake on·enggipa skulrangba sorkarini jako ong·ja ine Education Minister parakataha.
Ia bilsini gisepo a·dokni Chief Minister, dam 191 sorkari LP skulrangko aro dam 203 higher secondary aro secondary skulrangko taridapna gita tangka paisarangko chame on·aha ineba Rymbui parakataha.