TURA: Mongolbar walonin dontonggija mikkarang waangahanichi Budbar salo, Garo Hills-ni bang·bata biaprangon chi bananirangko, a·a be·anirangko aro bol be·anirangko nikna gita man·angaha.
West Garo Hills a·jaoba Mongolbar walgimik aro Budbar salgimikan mikkarang dontonggija waangahanichi, bang·bata biaprangon chi bananirangko, a·a ruronganirangko aro bolrangni be·dapanirangko nikna man·aha.
Tura-oni Dalu-ona dakanggipa ramani dingtang dingtang biaprango a·a ruronganirangko aro bol be·dapanirangko nikna man·aha aro ramako NHIDCL-ni manderang, dingtang dingtang kolrangko jakkale rongtalatpilna gita nangaha.
Koborko on·ani gitade, Darengre jolo autorickshaw bolsako mande gnang bol be·dapaha aro auto-ko saltimgipa mande bilongbee saknaanirangko man·na nangaha. Indake ong·genchimoba, rasong gnange gipinmanderangde maming a·sel nanga gri jokaha ine kobor on·aha.
West Garo Hills a·jani a·kawe jolrango chi bananirang aro a·a ruronganirangko nikna man·skaaha indiba da·o dipet maming dal·a a·sel ong·ani giminde kobor dongkujaenga.
West Garo Hills a·jani Deputy Commissioner Ram Singh-ni u·iatani gitade, Tura-Dalu ramao aro Selsella jolrango a·a aro bol be·anirangko bang·en nikna man·aha aro Selsella jolo donggipa Singwil chibimaba dal·bana a·bachengahani gimin manderangna kenchakna nangani ong·engaha.
South Garo Hills a·jaoba mikkarang dontonggija waangahani a·sel bang·bata biaprangon a·a be·anirangko aro rama jal·langrangni nosto ong·aniko nikna man·aha aro Budbar pringo Ruga jolo donggipa dolong ge·sako chi pe·angahani a·sel da·o ia songrangona dakanggipa rama chu·gimik champengatako man·aha.
South Garo Hills a·jani Kapasipara, Chokpot-ni Deku aro Sibbari jolrangoba chirang banengaha aro Tura-oni Dalu-ona dakanggipa NH-51 ramaoba a·a aro bolrang be·e rama champengatako man·angaha.
East aro South Garo Hills a·ja gita jokangenggipa Simsang chibimaba Budbar pringo dal·baaha aro uandaken Simsang chisamo songdongenggipa manderangna kenchakna nangani ong·engaha ine koborko on·aha.
Indake ong·engon, Garo Hills-ko man·chape Meghalaya a·dokni dingtang dingtang biaprango re·baenggipa July 5 tarikona mikkarang jime waangkunaba gnang ine Indian Meteorological Department (IMD)-oni mikrakataniko on·angaha.