TURA: Adita salrangna skang, Haryana a·dokni Gurugram-o Nagaland a·dokoni A·chik sakgni kragija obostao siangahani gimin Garo Students Union (GSU) aro Niksamso A·chik Society (NAS) dolrangba raken jegalataha aro ia a·selni bidingo kakketko ma·sina man·na gita ta·raken am·sandianirangko dakchina dabiangtokaha.
Ia a·sel ong·aniko GSU jegalatengon, ia A·chik sakgnini sianio jak donggipa manderangko aro mongsongbate sianggipa Samuel Sangma-ko kragija dake dokgipa doctor-ni kosako rakgipa sastirangko on·china dabiangaha.
“Sianggipa mandeni ka·rikgipa video-rangoniko nikrikna man·ani gitade, ia doctor uko kragija dake dokaha aro hospital-o sianggipa me·chikni gimin uni sing·anirangna uamang mamingkon aganchakjaha. Uni matnangani gita ia me·chikna hospital-ni ICU-o ice cream on·bebeama on·bebeja uko name am·sandina nangchongmota. Minggipin video-oniko nikna man·ani gitade, ia mandeni ja·arango mata bu·ani chinrang donga aro ian uko kragija dake dokani a·sel ong·na man·a,” ine GSU-ni president Tengsak Momin parakatenba, ia pilakkon tale ma·sina man·na gita ta·raken inquiry-ko dakna nanga aro dos donggipa manderangni kosako rakbatgipa ja·kurangko de·na nanga ine dabiangaha.
Ia a·selni bidingo jako ra·e dakgrikchina gitaba GSU, Assam-ni A·chik MLA Dr Numal G Momin-ko didiangaha aro iana dakgrikanio dakchakanirangko on·china Meghalaya a·dokni Chief Minister Conrad K Sangma baksana a·dokni MP-rangkoba didiangaha.
Apsan daken ia a·selni bidingo Niksamso A·chik Society (NAS)-ba suk ong·gijaniko parakataha aro ia a·selni bidingo inquiry-ko dakchina ma·mong sorkario dabiangaha.
“India a·songni gipin bakrango pangnan salgro salaram jolni manderangko mikchepronga aro ka·saninggija dakrongani gimin salgro salaram jolni manderangnade a·songni gipin biaprango kamrangko ka·e cha·pana aro poraina namen kenbena nangani ong·engaha. Ia changoba apsan daken salgro salaram jolni manderangko kragija dakani a·selan A·chik sakgnini janggirang gimana gita nangaha,” ine NAS-ni general secretary Tengrak Marak parakatenba, sianggipa Rose Sangma aro Samuel Sangma-ni nokdangna kakket bichalko on·na gita iani bidingo inquiry-ko dake dos donggipa manderangni kosako rakbatgipa sastirangko on·na nanga ine dabiangaha.
Mikkangchi iandakgipa a·selrangko chel·chakna man·na gita salgro salaramni pilak chief minister-rangko, MLA-rangko, MP-rangko, NGO-rangko, chatro chatrirangko aro jolo songdongenggipa pilak manderangkon ku·cholsan bakrime ku·rang on·china gita NAS didiangaha.