SHILLONG: Shillong YMCA, Y’s Men International, YMCA of India-National Council aro YMCA North East India Region baksa apsan bakrime, mejal Sonibar salo National Christian Day-ko gisik ra·e maniani bak gita Shillong, Nongmensongo donggipa konta 24-ni Crisis Management Centre for Children-ni sak 350 bi·sarangna da·ororo covis dabisina neng·nikani somoio manderangni nangchongmotgipa bosturang, jekai mirong, alu, rasin, kari aro uandakgipa bosturangko suale on·angaha.
YMCA Shillong, Boards of Director-ni membor-rang uamangni President Most Revd. Dr. P. Lyngdoh, Hony Secretary D.L. Warjri mangni dakdilanichi, ‘‘Heal the Wrold, chong·motan a·gilsakko namatpilani’’ ingipa project-ni bak gita mijalo Covid -19 Relief Support-rangko on·angaha.
Uamangni bi·sarangna bostu suale on·angani somoio YMCA-ni Regional Secretary NEI Shamir Thabah-ba dongpaaha. Ia project-ko YMCAs of India-National Council-ni gita tangka-paisarangko on·anichi dakchakanirangko on·angskaaha.
Program-ko a·bachengatani somoio Reach Shillong Ministries(RSM)-ni president, Rev R.G. Laloo, YMCA Shillong-ni gita da·ororo covid sabisina neng·nikani somoirango manderangna dakchakanirangko a·bachengatani bidingo an·tangni namnikpae kusi ong·aniko parakataha.
Uni parakani gitade, da·ororo neng·nikani somoirango RSM, Shillongo gisikni gita bilgrigipa aro toromo bebe ra·gipa sakantiko nama ramaona re·dile mesokani, uamangni janggiko jokatani, simsakani, bilchi-jakchi jaksokatanina miksonge, ia mission-ko a·bachengataha.
Uandake, RSM, salo dikdiksana dongchakani, bi·sarangko nirok-simsakna ba donchakna rikgipa nokko aro uarangna agreba, neng·nikaniko aro dilsretaniko man·enggipa manderangna skie on·ani program-rangko ong·atna ine a·bachengataha.
Indake ong·engon, Rev P. Lyngdoh, ‘heal the world’ ingipa katta bi·chongko miksongani done songsalna dangdike on·ani aro re·mikkangani miksongani gimin agan-talatange on·aha.
Uarangna agreba, ua da·ororo songsalo chadamberang gisikni aro be·enni gita bilgrigipa chadamberangna aro dilsretako man·enggipa bi·sarangnaba namgipa ku·pattianirangko on·angjolaha ineba koboro janapaha.
