TURA: Meghalaya a·doko aro mongsongbate East Garo Hills a·jaoba COVID-19 giproroengkuani gimin sabisini giproroaniko champengna gita East Garo Hills a·jani District Magistrate Swapnil Tembe, dingtang dingtang niamrangko ra·gate on·angtaiaha.
Deputy Commissioner-ni u·iatani gitade, gital u·iataniko on·taikujaskal East Garo Hills a·jani ning·o donggipa skul aro college-rangko chipe donangkugen indiba skul aro college-rangko chipe donengmiting somoio internet gita class-rangko ra·skana man·gen.
Walni curfew-ko walantian attam 5:00 bajioni pring 5:00 bajiona ra·gatangkugen indiba ian sipai dolrangna, medical-ni manderangna aro nangchongmotgipa bosturangko salbaenggipa garirangnade maming nangchakeani dongjawa ine DC u·iataha.
Williamnagar Municipal-ni ning·o nangchongmotgipa dokkanrang, jekai galamal, me·su, dud, bite, be·en aro uandakgipa dokkanrangko Sombar saloni Sukrobar salona pring 8:00 bajioni attam 2:00 bajiona kulina man·gen indiba gipin dokkanrangkode Mongolbar, Budbar aro Bristibar salrangosan pring 8:00 bajioni attam 2:00 bajiona kulina man·gen ine DC u·iataha.
Williamnagar Municipal-ni ning·o mande salruragipa garirang, jekai auto, taxi maxicab aro uandakgipa garirangko salo 50 percent ka·e re·rurana on·gen ineba DC parakataha.
Deputy Commissioner-ni u·iatani gitade, Sombar, Budbar aro Sukrobar salrango 1,3,5,7 aro 9 nomborchi bon·egipa garirang aro Mongolbar, Bristibar salrangode 2,4,6,8 aro 0
nomborchi bon·egipa garirang salrurana man·skagen.
Antini bon·angachibara East Garo Hills a·ja gimikon chu·gimik lockdown-ko ra·gatengani gimin July-ni 9 tarik attam 5:00 bajioni July-ni 12 tarik pring 5:00 bajionade dokkanrang aro gari gorarang re·rurana man·jawa ine DC u·iataha.
Da·o dipet antio changprak kuligipa bazar antirangkoba kulina man·jawa.
Olakkiram nokrangkoba chipe donangkugen aro da·o dipet East Garo Hills a·ja gimikon toromni gita, songsalni gita ba uandake jinma tom·anirangko ong·atna man·kujawa. Mande sianirangode Deputy Commissioner-oniko permission ra·chengenba sak 10-na bate tom·na man·jawa indiba da·o dipet biarangkode ka·na on·skakujawa ine DC u·iataha.
Da·o dipet gipin a·dokrangoni darangba East Garo Hills a·jaona napbana man·jawa aro tourist spot ba manderangni rochakgipa biaprangkoba chipe donangkugen.
East Garo Hills a·ja gimikon da·o dipet kal·susaanirangkoba ong·atna man·kujawa ine u·iataha.
Kam nangchongmotana nokoni ong·katengon, mask-rangko ganjringchina, saksa sakgipinoni chel·tangrike dongchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.