TURA: South Garo Hills a·jani Deputy Commissioner SF Hamid-ko South Garo Hills a·jaoniko kam ra·jitangkujachina gita Garo Students Union (GSU) Mindikgre regional unit, Meghalaya sorkariko didiataha.
South Garo Hills a·jani Deputy Commissioner ong·enggipa SF Hamid-ko bilsi gittamna Jammu & Kashmir cadre-o join ka·na man·na gita Meghalaya sorkari, Assam-Meghalaya joint cadre-oniko watahachim ine nikna man·a.
Indake ong·engon, South Garo Hills a·jana aro a·jao songdongenggipa manderangni namgnirangko kamrangko dangdike on·angkuna man·na gita Hamid-ko South Garo Hills a·jani DC ong·e donkuchina gita GSU Mindikgre unit, Meghalaya a·dokni Chief Minister Conrad K Sangma-ko didiataha.
“South Garo Hills a·jani Deputy Commissioner ong·e kamko ka·enggipa SF Hamid, saksa kakketgipa aro manderangni namgnina an·tangko on·kange kam ka·enggipa ong·a aro uni dilanichi chinga South Garo Hills a·jao dingtang dingtang kamrangko nikna man·aha. Uni gimin Hamid-ko South Garo Hills a·jani deputy commissioner ong·e donangkuchina chinga mol·molenga,” ine GSU Mindikgre regional unit-ni president Greneth M Sangma parakataha.
