SHILLONG: Ia bilsini July jaoni re·baenggipa November jaona Pradhan Mantri Garib Kalyan Anna Yojana (PMGKAY)-ni metric ton 53,638 merongko India sorkari, Meghalaya a·dokna chamataha.
Ia PMGKAY-ni merongko salgro salaram jolo donggipa damgittam a·dokrangna, chong·motan Meghalaya, Mizoram aro Tripura a·dokrangna gimik MT 1,32,413 merongko chamataha aro ianoni MT 53,638-ko Meghalaya-na, MT 16,705-ko Mizoram-na aro MT 62,070-ko Tripura a·dokna chamataha ine Food Corporation of India (FCI)-ni official-rang parakataha.
FCI official-rangni u·iatani gitade, ia PMGKAY-ni merongko beneficiary sakprakna sorkari, kg 5 ka·e indin sualataha aro ia scheme-ni namgniko man·enggipa manderangara, Meghalaya a·doko sak lak 21.46, Mizoram a·doko lak 6.68 aro Tripura a·doko lak 24.83 manderang donga.
Ia merongni korosko ma·mong sorkari game on·gen ine talataniko on·angengon, COVID-19 giproroengani a·sel a·songo songdongenggipa manderang neng·nikanirangko chagrongna nangtokengani gimin India sorkari, TDPS-ni ning·o namgniko man·enggipa manderangna, ia merongko indin sualataha ine FCI-ni official-rang parakataha.
