SHILLONG: Da·ororo Meghalaya a·doko gital COVID man·dapgiparang adita komiangahaoba COVID man·e sigiparang komiskajaenga maina Robibar saloni Sombar salona konta 24-ni gisepon, a·dokni dingtang dingtang biaprango gimik saksku manderang COVID man·e siangdapaha.
Robibar saloni Sombar salona konta 24-ni gisepo Meghalaya a·dok gimiko sak 377 manderang COVID-19-ko man·dapaha indiba batanggimin somoirangko hisapede ian komibataha.
Sombar salo COVID-19 man·dapgipa sak 377 manderangko channe da·o Meghalaya a·dok gimiko COVID-19 man·e dongenggiparang gimik sak 4354 gapengaha aro ia apsan salon sak 9 manderang COVID-19 man·e siangdapahani gimin a·dok gimiko COVID man·e sianggiparangara gimik sak 871 gapskaengaha.
Sombar salo positive ong·gipa sak 377 manderangoni sak 7-de East Garo Hills-o, sak 11-de East Jaintia Hills-o, sak 128-de East Khasi Hills-o, sak 4-de North Garo Hills-o, sak 134-de Ri Bhoi a·jao, sak 2-de South Garo Hills-o, sak 2-de South West Garo Hills-o, sak 2-de South West Khasi Hills-o, sak 27-de West Garo Hills-o, sak 37-de West Khasi Hills-o aro sak 23-de West Jaintia Hills a·jao ong·a.
Konta 24-ni gisepo COVID man·e sianggipa sak 9 manderangoni sak 4-de East Khasi Hills-o, sak 1-de South West Garo Hills-o, sak 1-de South West Khasi Hills, sak 1-de West Garo Hills a·jao aro sak 2-de West Jaintia Hills a·jao ong·a.
Ia apsan salon gimik sak 448 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 46,676 gapskaengaha.
