SHILLONG: Saubhagya Scheme-ni bidingo BJP-ni RTI ka·aniko ma·sija ine Sombar salo a·dokni Power Minister James K Sangma a·kangataha.
“Ia RTI sokbaa dongkuja indiba MeECL-ona sokangenggen. Anga an·tangde iani bidingo mamingkoba ma·sija,” ine Sombar salo a·dokni Power Minister James Sangma parakataha.
RTI Act-ni ning·o Saubhagya Scheme-ni gimin talatanirangko on·jahani gimin a·dokni BJP dol, Meghalaya Energy Corporation Limited (MeECL)-ni kosako mokordoma ka·na manchiangahachim ine nikna man·a.
Koborko on·ani gitade, Saubhagya Scheme-ni ning·o ma·mong sorkarioniko Meghalaya sorkarini man·sogipa tangka paisa, ia scheme-ni ning·o badita nokdangrang bijoliko man·aha aro songadam nokadamrango badita nokdangrangna bijolirangko on·na nisanko donaha, iarangni bidingo talataniko on·china gita re·anggipa bilsini November 6 tariko BJP dol, RTI-ko ka·ahachim.
