SHILLONG: Batanggimin adita salrangni gisepo Meghalaya a·doko COVID man·enggiparang adita komiangahaoba Budbar saloni Bristibar salona konta 24-ni gisepo sak 532 manderang, a·dokni dingtang dingtang biaprango COVID-19-ko man·daptaiaha.
Bristibar salo COVID-19 man·dapgipa sak 532 manderangko channe da·o Meghalaya a·dok gimiko COVID-19 man·e dongenggiparang gimik sak 4391 gapaha aro ia apsan salon sak 4 manderang COVID-19 man·e siangdaptaiahani gimin a·dok gimiko COVID man·e sianggiparangara gimik sak 890 gapskaengaha.
Bristibar salo COVID positive ong·gipa sak 532 manderangoni sak 11-de East Garo Hills-o, sak 14-de East Jaintia Hills-o, sak 136-de East Khasi Hills-o, sak 6-de North Garo Hills-o, sak 178-de Ri Bhoi a·jao, sak 16-de South Garo Hills-o, sak 6-de South West Garo Hills-o, sak 14-de South West Khasi Hills-o, sak 52-de West Garo Hills-o, sak 62-de West Khasi Hills-o aro sak 37-de West Jaintia Hills a·jao ong·a.
Konta 24-ni gisepo COVID man·e sianggipa sak 4 manderangoni sak 1-de East Khasi Hills-o, sak 1-de Ri Bhoi a·jao, sak 1-de East Jaintia Hills-o aro sak 1-de West Jaintia Hills a·jao ong·a.
Ia apsan salon gimik sak 366 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 47,963 gapskaengaha.