TURA: Samuel Sangma-ni manggisiko post mortem ka·e report-ko on·anio maming ong·gija dakani dongja aro ua an·tangsa so·ote siaha ine doctor-rangni parakaniko A·chik Holistic Awakening Movement (AHAM) jegalatenba, uni manggisiko forensic expert-rangchi gital dake post mortem ka·taichina dabiangaha.
Adita salrangna skangsan, Samuel Sangma-ko post mortem ka·ani report-ko man·ani ja·man uni sianio maming chanchichipna nangani katta dongja aro uni be·en bimangrango maming mata bu·ani chinrang dongja ine Delhi police-rang parakatahachim. Uni ja·skuo adita saknaani chinrang donggipani bidingo janapatengon, uni manggisiko ra·onani somoio a·ao nangani a·selsa chin dongaha ineba police-rang a·kangatahachim.
Indake ong·genchimoba, iandake report on·aniko AHAM raken jegalatskaaha aro uni ku·chilo ripomani, wagam be·ani aro uni be·enrango dagi donganirangan uko so·ota ine chanchichipna nangani ong·enga ine parakatskaaha.
Ma·degipa Rose Sangma-ni siangani ja·man hospital-o Samuel-ni video ka·gipaoba doctor saksani uko kragija dake chadrappangpilaniko aro dokaniko nikna man·ahachim. Iandake doctor saksani uko dokani ja·man salgipinon uni sigimin manggisikosa hotel kuturio dingdee dongako man·aiahachim.
Indake ong·engon, Bristibar salo AHAM-ni president Champion R Sangma, ia a·selni bidingo ma·mongni Union Law & Justice Minister Kiren Rijiju-na sedoatenba, Samuel Sangma-ni manggisiko forensic expert-rangchi gital dake post mortem ka·taichina didiataha aro ia a·selni bidingo CBI inquiry-ko dakenba, dos donggipa manderangni kosako rakgipa ja·kurangko de·china dabiangaha.
