SHILLONG: Re·baenggipa July-ni 17 tariko Union Home Minister Amit Shah, a·dokni skotong Shillong songjinmaona re·baengani gimin a·doko Inner Line Permit (ILP)-ko ra·gate on·china dabienggipa dingtang dingtang dolrangnaba somoiko on·china gita Home Ministry-ko didiataha ine Sukrobar salo a·dokni Chief Minister Conrad K Sangma parakataha.
“Meghalaya a·doko ILP-ko ra·gatchina dabienggipa dingtang dingtang dolrangba Union Home Minister-ko grongna nangniktokengani gimin uni Shillong-ona re·baani somoio NGO-rangnaba somoiko on·china gita anga mol·molataha,” Chief Minister parakataha.
Batanggimin somoirangoba Amit Shah-ni Shillong-ona re·baani somoirango ILP-ko dabienggipa dolrang, uko grongna jotton ka·tokahachim indiba ua NGO-rangko gronggija NGO-rangni seatgipa memorandum-kosan ra·angaiahachim ine nikna man·a.
Indake ong·engon, Union Home Minister-ni Shillong-ona re·baani somoio ua an·tangba ILP aro gipin nangchongmotgipa kamrangni bidingo Home Minister baksa agangrike nigen ine Chief Minister parakataha.
Meghalaya a·doko ILP-ko ra·gatchina didie, 2019 bilsini December jaon Meghalaya Legislative Assembly-oba dingtangmancha resolution-ko ra·manahachim ineba nikna man·a.
Meghalaya a·doko dingtang dingtang NGO-rang aro gipin dilgiparangba ILP-ko ra·gatchina changni chang ma·mong sorkarina u·iatahaoba da·onan iani bidingo ma·mong sorkarioni maming aganchakanirang dongskakujaengachim.
Union Home Minister Amit Shah-ni da·o Shillong-ona re·baani somoio ua salgro salaramo donggipa dingtang dingtang a·dokni chief minister-rang baksa tom·e chanchirimanggen aro ia tom·anio chief secretary-rang aro police official-rangba dongpae bakko ra·anggen ineba Chief Minister parakataha.
Chief Minister-ni parakatani gitade, Union Home Minister salgnina a·dokona re·baenga aro uni a·dokona re·baanio ua dingtang dingtang project-rangkoba a·bachengate on·angjolgen.