SHILLONG: Meghalaya a·doko kulina sienggipa Eklavya Model Residential School (EMRS)-rangna skigiparangko seokanioba a·dok sorkari, Meghalaya a·dokni Job Reservation Policy-ko ja·rikgen ine a·dokni Education Minister Lahkmen Rymbui parakataha.
Rymbui-ni parakatani gitade, adita salrangna skang, a·dokni Chief Minister Conrad K Sangma, Education Minister aro a·dokni gipin dilgiparang, iani bidingo Union Tribal Affairs Minister Arjun Munda-ko gronge agangrikaha aro EMRS-ni skigiparangko seokanio a·dokni job reservation policy-kon ja·rikna on·gen ine Union Minister parakataha.
Meghalaya a·dokna dam 14 Eklavya Model Residential School-rangko ma·mong sorkari on·manahachim aro da·o Nongpoh aro Samanda-ode ia skul nokrangko rikna a·bachengahachim.
EMRS-ni skigiparangko seokanio a·dokni job reservation policy-ko ja·rikna ma·mong sorkari on·manahani gimin da·o ia skulrangko nirokna a·dokni Chief Minister, dingtangmancha committee-ko songe donanggen aro iani bidingo mikkang antio tom·e chanchirimanggen ine Rymbui parakataha.
“Skigiparangko ma·mongonisa seokgen ine a·bachengode tik ka·ahachim indiba all-India reservation policy-ko ja·rikgenchimode Scheduled Tribe-rangna 7.5 percent-san ong·aiani gimin chinga a·dokni job reservation policy-kon ja·rikna gita ma·mong sorkario bi·aha,” ine a·dokni Education Minister parakataha.