State BJP-o golmal ong·anina Dr Chuba Ao jajrengata

SHILLONG: State BJP-o golmal ong·engani gimin BJP National Vice president aro Meghalaya-ni in-charge Dr M Chuba, jajrengatenba, party-ni ning·o golmal ong·ako ba neng·nikarangko  meligrike tom·tomatchina aganataha aro Covid- ni niamrang olgrokanga ja·man meeting tom·e chanchirimna aga-naha.  A·dokni BJP dolgni dake ong·enga, dilgipako seokani bidingo golmal ong·enga, dolsa BJP-ni a·gipi dilgipa aro Health Minister AL Hek-ko gital president songna aga-nenga. Indake ong·engon president Ernest Mawrie-de, ‘jegalgipa dolrang Hek-ko ding·doatenga, iarang gimikan politics kal·anisan ong·a,” ine aganskaha.
A·doko BJP camp, maidakgipa obostako cha-grongenga ia u·ia ine janapatenba, BJP National vice president indine aganaha, “party-ni kattako party ning·o meligrike tom·tomatna nanga, maina jinmana u·iatna nanga, gimik dakgipa neng·nika ba golmal ong·anina namatani chol donga.”  A·dok BJP-o maidake joljol dingtang dingtang neng·nikanirang nakatenga ine jajrengate, Dr Ao indine agandapaha, “neng·nikako tom·tomatna ba namatna dilgiparang apsan asonge agangrikna nanggen. Kobor ra·timgi-parangna jeba an·tangni chanchiako parakna man·a, indiba anga an·tang Shillong-ona re·angosan chong·mot obos-tako u·ina man·gen aro dilgiparang baksa agan-grikgen. Aro party-ni bidingo bidingo maiko dakgen dakjagen iani bidingo bon·kame New Delhi-ni dilgiparang-san tik ka·gen ine Dr Ao agandapaha.”