TURA: Garoland State Movement Committee (GSMC) aro HSPDP-ni dilgiparang mejal Sonibar salo Tura Circuit House-o a·dok ba ma·mong sorkarini gita covid sabisina ra·gatgimin niamko ja·rike uamangni ru·uta bilsirangna skangoni dingtang a·dokna dabibaengani bidingo apsan tom·e chanchirimangaha.
Dolgnini tom·e chanchirimaniko GSMC-ni Chairman aro Co-Chairman Mr Balkarin Ch. Marak mangni dilachi HSPDP-ni dilgiparangko rim·chaksoaniko dake tom·e chanchirimaniko a·bachengataha.
Koborna parakatani gitade, GSMC aro HSPDP dolgnini dilgiparang apsan tom·e chanchirimianio mongsonggipa ming gittamni bidingo resolution-rangko ra·gatangaha.
Dolgnini tom·e chanchirimani skanggipa bako, dingtang a·dokna dabianio re·mikkange ja·ku de·dilangchina gita GSMC aro HSPDP dolgnioniko Co-ordination Committee seokangna ine tik ka·aha.
Gnigipao dolgnini dilgiparang, ma·mong aro a·dok sorkarina iani bidingo apsan nangdime Memorandum-ko on·angna ine tik ka·aha. Uandake, GSMC aro HSPDP dolgnini gisepo a·dok dingtangko man·a ja·ku de·e re·mikkanganio Garo aro Khasi-Jaintia jatgittamon, jatsa jatgipinko mikneng-miksigrikatgija aro jatsa-jatgipina gisik sagrikani donggija ba duk-mikchiona ra·bagija a·dokko man·a gita dakgrikangkuna ine tik ka·aha.
Khasi aro Jainti-ni gita bikotgipa political party HSPDP, jekon Mr K. P. Pangniang aro MLA gitcham, Mr P Rynthathiang aro Mr Starting Pdahkasiej mangni President, Joint Secretary aro Executive Membor ong·e dilengachim, uamangba apsan miksonganio re·bae tom·anio bakko ra·angpaaha ine GSMC-ni dilgipa parakataha.
Uandake, GSMC-ni dilgiparang, jemangan tom·anio bakko ra·angpaahachim uamangara, GSMC, H.Q. Tura,-ni Chairman , Co-Chairman Mr Balkarin Ch. Marak, Garoland-na dakgrikdilaniko dilenggipa Mr Roger Benny A. Sangma, Mr Ryan Ch. Marak, Mr Lapthon Ch. Marak, GSMC Babadam Unit-ni Chairman, Mr Cyril A. Sangma, Dadeng Zone GSMC-ni Chairman, Mr Willingbirth M. Marak, GSU East Zone, Williamnagar-ni president, Mr Saljrang Tengrik R. Marak, Asst. Organising Secy, Mr Jason Tengkrang M. Sangma aro gipin dilgiparangba bakko ra·angpaaha.
Indake ong·engon, dolgnini tom·e chanchirimanio jatgni apsan ba ku·cholsan ong·e bakrime iana dakgrikangkugenchimode, miksonganiko seng·gnang chu·sokatna gnang. Unigimin dingtang a·dokko man·a gita da·on an·ching mikrakani somoi sokaha ineba GSMC-ni dilgipa parakataha.
