TURA: Adita salrangna skang, Haryana aro Delhi a·dokrango Nagaland a·dokni chadambe sakgni, ong·na kragija bewalo siangahani gimin Gambegre block-ni ning·o donggipa Chenggapara songoba jinma tom·aniko ong·ate, sianggipa janggirangna bi·chakangan baksana sianggipa mande sakgnini nokdangrangna kakket bichalko on·china dabiangtokaha.
Ia tom·anio songni dingtang dingtang dilgiparang jinmana aganprakengon, Haryana a·dokni hospital-o ong·gipa a·selni bidingo aro A·chik chadambe sakgnini ong·na kragija bewalo siangahani gimin jinmana agan-talataniko on·angenba, A·chik jat gimikni namgnina ia obostako jegalgrimchina aro sianggipa manderangni nokdangrangna bi·chakchina gita tom·anio bak ra·giparangko didiangaha.
Ia a·selni bidingo name am·sandianirangko daktaienba dos donggipa manderangna sastirangko on·kujaskal uamang jegalanirangko dontongkujawa ineba ia tom·anio dilgiparang parakataha.
