TURA: West Garo Hills a·jaoba COVID-19-ni batrikrikaniko warachakangkuna gita lockdown-ko July 19 tarikona radodapataha ine West Garo Hills a·jani Deputy Commissioner Ram Singh u·iataha.
Deputy Commissioner-ni u·iatani gitade, pilak nangchongmotgipa dokkanrangko Sombar saloni Sukrobar salona pring 8:00 bajioni attam 4:00 bajiona kuliangkugen indiba gipin dokkanrangkode Mongolbar, Budbar aro Bristibar salrangosan pring 8:00 bajioni attam 4:00 bajiona kuliangskakugen.
Garirangkoba odd/even nomboro pangchake re·rurana gita district administration, niamko donangkuaha aro Deputy Commissioner-ni u·iatani gitade, Sombar, Budbar aro Sukrobar salrango 2,4,6,8 aro 0 nomborchi bon·gipa garirang re·rurana man·gen aro Mongolbar, Bristibar salrangode 1,3,5,7 aro 9 nomborchi bon·egipa garirang re·ruraskana man·gen.
Indake ong·genchimoba attam 5:00 bajioni pring 5:00 bajionade walantian curfew ong·engani gimin 5:00 bajini ja·mande gari gorarang re·rurana man·jawaha ine DC u·iataha.
Ma·mong aro a·dok sorkarini office-rang pring10:00 bajioni attam 4:00 bajiona kamko ka·angkugen ineba DC u·iataha.
Sonibar aro Robibar salrangode West Garo Hills a·ja gimikon chu·gimik lockdown ong·angkugen aro ia salrangode dokkanrangko kulina man·jawa aro gari gorarangba re·rurana man·jawa ine DC u·iataha.