SHILLONG: Skangoni dabienga gita Garo aro Khasi-rangna dingtang a·dokna dabianiko Hill State People’s Democratic Party (HSPDP) aro Garo National Council (GNC) a·bachengtaignok ine HSPDP-ni president KP Pangniang parakataha.
Pangniang-ni u·iatani gitade, adita salrangna skang, uamang Tura-o tom·aniko ong·atenba, dingtang a·dokna dabianiko a·bachengpiltaina tik ka·angaha.
Iani bidingo skangonin HSPDP-ni gitcham dilgipa Hoping Stone Lyngdoh aro GNC-ni gitcham dilgipa Clifford R Marak, kamrangko ka·dilahachim ine janapatengon, ia dabianiko a·bachengpiltaina gita uamang bakrime soi ka·aha aro ia soi ka·giminko uamang a·songni Prime Minister Narendra Modi aro ma·mong sorkarina on·atgen ine HSPDP-ni president parakataha.
Meghalaya a·doko songdongenggipa Garo aro Khasi-rangna dingtang a·dokko nangenga ine janapatengon, iani bidingo dolgni nangrime coordination committee-ko songgen ine Pangniang parakataha.
Pangniang-ni aganani gitade, Garo aro Khasi jatgnian daka rikani, ku·aganani aro biapni gitaba dingtanggrikani gimin ia jatnian dingtang a·dokko man·na nangani ong·achim.
1955 bilsio India sorkarini State Reorganisation Committee-ni dongimin niam gitade, India a·songni state ba a·dokrangko ku·sik agananio pangchakesa songe on·achim aro uandaken Meghalaya a·dokoba Garo aro Khasi jatgnian dingtang dingtang ku·sikrangkosa jakkalani gimin dingtang a·dokko man·na krachongmota ine HSPDP-ni president parakataha.
Adita salrangna skangsan GHADC-ni chief executive membor aro deputy CEM-ba tom·aniko ong·ate, dingtang Garoland a·dokna dabina gita resolution-ko ra·angaha ineba HSPDP-ni president parakataha.