SHILLONG: A·dokni Director General of Police (DGP) R Chandranathan, kamtangoni neng·takangani ja·man, additional DGP ong·enggipa me·chik police officer Idashisha Nongrang-ko gital DGP songrikskachina Hynniewtrep Youth Council (HYC), a·dokni Chief Minister Conrad K Sangma-ko didiataha.
A·dokni DGP R Chandranathan, da·o re·baenggipa November jaon an·tangna dongimin term-ko matchotengahachim aro ua December jaon kamtangoni neng·takna siengahachim.
Indake ong·engon, a·dokni saksa ja·delbatsranggipa me·chik police officer-ko DGP songgenchimode ian a·doko songdongenggipa Tribal-rangnasan ong·aigija a·dok gimiknan mikkim rasongni ong·gen ine HYC parakatenba, da·o ong·enggipa DGP kamtangoni neng·takangani ja·man Nongrang-ko a·dokni skanggipa me·chik DGP songchina a·dok sorkariko didiataha.
“Batanggimin somoirango, a·doko kam ka·enggipa ja·delgimin police officer-rangni pal gipin a·dokrango dangdike on·enggipa police officer-rangkosa a·dokni DGP songaha ine chinga nikna man·aha indiba ia changode a·doktangonikon dal·batgipa police officer-rangoniko DGP songskachina chinga nangnikenga,” ine HYC-ni general secretary Roy Kupar Synrem parakataha.
HYC-ni parakatani gitade, da·o dipet a·doko ADGP (L&O/TAP)-ko kamko ka·enggipa Idashisha Nongrang-an dal·batgipa officer ong·enga ine Meghalaya Police-ni official website-o IPS Officer-rangko see rakkianioba parakachim aro uandaken DGP-ni kamko jako ra·na gita Nongrang-an krabatsranggipa police officer ong·engachim.