SHILLONG: Meghalaya a·doko Tourism-ni kamrangko a·bachengatpiltaina man·na gita a·dok sorkari cholrangko nienga ine Sukrobar salo a·dokni Chief Minister Conrad K Sangma parakataha.
“COVID-19-ni giproroaniko champengna lockdown-rangko ra·gatna nangani a·sel Tourism-ni kamrang namen tang·onna gita nangengahani gimin chinga COVID-19 giprorona kenchakna nangani gri kamrangko a·bachengpiltaina cholrangko sandienga,” ine Chief Minister aganaha.
Chief Minister-ni parakatani gitade, Tourism-ni kamrangko a·bachengpiltaina man·ama man·kujawa, uarangni bidingo Tourism-o bak ong·enggipa dingtang dingtang dolrang baksa agangrikchina gita sorkari, deputy commissioner-rangna ge·etaniko on·atmanaha.
Tika su·aniko matchotgimin manderangkode da·o Meghalaya a·dokona napbana on·engahani gimin a·dokni dingtang dingtang biaprango donggipa tourist spot-rangko kulianioba ia apsan niamrangkon ja·rikna man·gen ineba Chief Minister aganaha.
Meghalaya a·doko a·ja damsaoni damgipinona re·ruraanirangkoba champengatengani a·sel manderang re·ruraanirango neng·nikanirangko chagrongna nangtokengani gimin sorkari iani bidingoba cholrangko niengaha ineba Chief Minister parakataha.
“Batanggimin adita jarangna a·ja damsaoni damgipinona re·ruraanirangko champengatahani a·sel bang·a manderangan neng·nikanirangko chagrongna nangtokenga. Uni gimin a·ja damsaoni damgipinona re·ruraanirangko on·piltaina gita cholrangko sandichina chinga deputy commissioner-rangna u·iataha,” ine Sangma aganaha.
Mikkang antiode bang·bata kamrangkon sorkari on·piltaiani cholrang dongengaha ineba Chief Minister parakataha.