SHILLONG: Meghalaya a·doko National People’s Party (NPP)-chi dilenggipa Meghalaya Democratic Alliance (MDA)-ni ning·o adita meligrikgijanirang aro dolsa dolgipinko matnanggrikanirang ong·engani gimin Sukrobar salo Meghalaya a·dokni Chief Minister aro NPP-ni national president Conrad K Sangma-ni dilanichi, MDA-o bakrimenggipa dingtang dingtang political dolrangni tom·aniko ong·atangaha.
Batanggimin somoirango MeECL-o tangka jakkalsreta ine matnanganirangna MDA-o bakrimenggipa dingtang dingtang dolrang, jekai UDP, BJP aro gipinrangba power minister aro NPP-ni MLA James K Sangma-ko ra·galchina dabitokengachim ine nikna man·a. MDA-o bakrimenggipa dingtang dingtang dolrang James-ko ra·galchina dabitokengoba, uko ra·galna gita Chief Minister jechakskaenba, MeECL aro Power department-o ong·enggipa obostarangko am·sandichina gita ge·etaniko on·angskaahachim.
MDA-o bak ong·enggipa dingtang dingtang dolrang baksa tom·a matchotani ja·mano kobor ra·timgipa manderang baksa agangrikengon, MeECL-o tangka jakkalsretaniko ning·tue sandichina ge·etaniko on·manaha ine MDA-o bakrimenggipa dolrangna talataha ine Chief Minister parakataha.
Ia tom·anio, Assam aro Meghalaya a·dokni simarango meligrikna man·jaenggipani bidingoba MDA-o bakrimenggipa dolrang chanchirimangaha aro ua iani bidingo Assam-ni Chief Minister Himanta Biswa Sarma baksa chief minister-ni gadango agangrikna gita tarikrangko Sonibar salo tik ka·anggen ineba Chief Minister parakataha.
“Ru·uta bilsirangonin Assam aro Meghalaya a·dokni simarango meligrikna man·gijagipa kamrangko namatchipna man·kujaengani gimin iana pangkamgipa cholko sandie kamko ka·na sorkari ja·ku de·enga aro iani bidingo anga Assam-ni Chief Minister baksa agangrikna somoiko ra·chenggen,” ine Sangma aganaha.
Chief Minister-ni parakatani gitade, a·dok damgnini gisepo meligrikgijaniko namatna gita sorkari, a·doko songdongenggipa manderang aro dingtang dingtang dolrang baksaba agangrikgen.
Indake ong·engon, MDA-ni tom·anio, dingtang dingtang dolrangni dabienggipa Inner Line Permit (ILP) aro da·o July-ni 24 tariko Union Home Minister Amit Shah-ni Shillong-ona re·bana sienggipani giminba jinma chanchrimangaha ine Chief Minister parakataha.
Ma·mongni Union Home Minister Amit Shah, da·o July-ni 24 tariko a·dokona re·baani ong·engachim aro ILP-ko dabienggipa dolrangba uko grongna nisengsotokengachim.
