SHILLONG: Garo Hills-o taridapgimin COVID care centre damgniko kulidapkugen ine official-rang parakataha.
Official-rangni u·iatani gitade, South West Garo Hills a·jao ge 50 palang donggipa Covid care centre-ko Ampati-o kuligen aro North Garo Hills a·jaoba ge 16 palang donggipa Covid care centre-ko Resubelpara-o kulidape on·gen.
Ia taridapgimin COVID care centre-rangko CSR project-ni ning·o kulina gita badiaba private company-rang dakchakgen.
“COVID-19-o nangchakegipa kamrangna private company-rang tangka paisarangko on·e dakchakna kusi ong·engani gimin bang·bata private company-rangan proposal-rangko tarichina a·dok sorkariko aganmanahachim. Batanggimin somoirangoba ia private company-rang, mitam health centre-rangna oxygen concentrator-rangko on·e dakchakahachim,” ine official-rang parakataha.
Meghalaya a·doko gittamgipa changna COVID-19-ni giproroaniona tarisamsoani bak gita a·dok sorkari, a·dokni gipin biaprangoba taridapgimin Covid care centre-rangko kulina cholrangko nienga ineba official-rang u·iataha.
Kobor on·timgiparangni u·iatani gitade, Lawmali Pyllun-ni Pasteur Institute-o taridapenggipa Covid Care centre-ko September jaon matchotna ka·dongengaha indiba Tura-o taridapenggipa Corona centre-kode matchotna somoiko nangkunaba gnang.