FKJGP, matchu mogipa chadambe sakgniko rim·ana Assam police-ko jegala

NONGSTOIN: Langpih Area Unit-ni Federation of Khasi Jaintia & Garo Peoples’ (FKJGP), mni Sukrobar salo Kyrdum songni bilsokkugijagipa chadambe bi·sarang sakgni, jemangan an·tangtangni matchuko moangengachim, uamangko kragija dake Assam police rim·ani uamangni kosako raken jegalataha.
Matchu motimna kamo donatako man·gipa chadambe bi·sarangko Assam Police rim·e ra·angenga ingipa kobor ta·raken songgimiko gipangaha, aro ua koborko man·soe songni manderang aro SDPO Mawshynrut I. Kharkongor MCS-ni dilanganichi Meghalaya police-rangba Assam police-rang baksa agangrike rim·a man·gipa chadamberang sakgniko watpilataha.
Uandake ia obostarangara, mni Sukrobar salo Kyrdum songo ong·angaha. Matchu moanganina dos grigipa chadamberangko Assam police-ni jako rim·a man·giparangara, Lebarius Khardewsaw (12) aro (14) Bomes Khardewsaw mangan ong·achim, uamang saknian Mawsikar songoni ong·a ine koborna parakataha.
Indake ong·engon, FKJGP Langpih Area Unit-ni President, Serbilin Lyngdoh, ua obostako ian Assam police-ni niam gri kragijagipa kamko ka·ani ong·chongmota ine jegale matnangataha.
Uni parakani gitade, uandakgipa kamrangara Langpih jolo dongdong-achapaenggipa manderangna jajrengbeatani ong·a aro uandakgipa mamlarangni bidingo a·dok sorkari, seng·gnangan Assam sorkari baksa agan-golpogrike namatna nangao ga·akenga. Ian skanggipa changna uandakgipa obostarangko jolo chagrongchenggipa ong·aha ineba ua agandapaha.
Serbilin-ni parakatani gitade, Assam police-rangni bilsokkugijagipa chadambe bi·sarangko kragija sinjete roanirangchi chanchisokkugijagipa chadamberangni gisikko nosto ka·aona ga·akenga ine aganaha.