TURA: Garo Hills-o covid sae saa man·dapgipa aro sianggiparang batrik-rikengani gimin West Garo Hills District-ni Magistrate Ram Singh, July 26 tarikona lockdown-ko ra·gataha.
Uandake Garo Hills a·jao antisani gisepon sak 5 covid sae siangaha.
Batanggimin Sombar salo Rongram-ni Chibra Agal songoni bilsi 50 ong·gipa me·asa aro South Garo Hills Barengapra-oni bilsi 30 ong·gipa me·chik Tura civil hospital-o sannaniko ra·mitingo siaha.
Sabri ja·man Sukrobar salo Williamnagar Balsrigittim joloni bilsi 45-ni gisepo ong·gipa sakgni me·chikrang aro Tura Spring Hills-oni bilsi 47 ong·gipa siaha.
Uandake South West Garo Hills -ni Nogorpara songoni jean Tura Sunny Hills-o dongengachim ua me·asa Sonibar salo siaha.
Indake ong·engon Garo Hills a·jao covid sabisi giproroako champengna authority, changsatai champenganiko ra·gatna ge·etaniko on·aha. West Garo Hills District Magistrate, Ram Singh, district-o July 19 tarik pring 5 bajioni July 26 tarik pring 5 bajiona champenganiko ra·gatang-kuna ge·etaniko on·aha. May jani 30 tariko on·gimin niamkon ja·rikangkuna ge·etaha.
Ge·etanio janapani gita, Tura Main ba mongs-onggipa Bazar jolo skango on·gimin niamkon ja·rike essential commodity ba nangchongmotgipa bosturangko palgipa dokanko kuligen. Aro district-ni gipin bakrango dokanko Sombar saloni Sukrobar salona pring 8 bajioni atam 4 bajiona kuli-gen. Non-essential dokan-rang jekai- gari tarigipa karkana (repairing) aro service on·gipa dokanrang-ko Mongolbar, Butbar aro Bristibar salo pring 8 bajioni atam 4 bajiona kulina man·gen. Unbaksana gimik dokanrangon vaccination ba covid tika su·ani lekkako mesokna nanggen.
Odd-even niamko ja·rike gariko watgen aro local auto aro maxi-cab jemangko salrurana wata, uamangba tika su·a-su·gijako parakna nanggen. Non-essential movement ba nangchong-mota gri ong·katjachina mol·molataha. Intra-district public transport-ko 50% capacity-o watgen. Jemangan songreani niamko pe·a ba tika su·a-su·gijako togie mesoka, uamang dai gamna gita nanggen ineba ge·etanio janapataha.
Central aro State Govt. office-rango pring 10 bajioni atam 4 bajiona kam ka·gen.
Unbaksana Sonibar Robibar salo lockdown-ko ra·gata baksana atam 5 bajioni pring 5 bajiona night curfew donggen.
