Shillong: Meghalaya sorkarini Arts and Culture Department, Meghalaya Model United Nations baksa bakrime Sonibar salo Shillong Fire Brigade-o dongipa U Tirot Sing-ni statue-o uni siani bilsi 186 gapani salko gisik ra·e manianiko ong·ataha. U Tirot Sing-ni colonial rule-ni kosako jegale dakgrikdilenba janggitangko on·chakaniko gisik ra·enba una mande ra·aniko on·na programme-ko ong·ataha. India-ni jakgittelani bilsi 75 gapaniko maniani bak gita ‘Azadi ka Amrut Mahotsav’-ko ong·ataha.
Tom·anio Chief Guest ong·e bak ra·enba Meghalaya sorkari Arts and Culture Department-ni Commissioner aro Secretary F.R Kharkongor, tom·anio bak ra·giparangna U Tirot Sing-ni janggitangko on·kange dakgrikani gimin agantalate on·aha. Aro Anglo khasi War-ni sakgipin dakgrikgipa ba warachakgipa dilgiparangkoba gisik ra·aha. A·songko jakgittelatna dakgrike sianggipa U Tirot Sinh, Kiang Nangbah aro Pa Togan Sangma- uamang tribal jatni dal·dalgipa dilgiparang ong·a, ine uamangko gisik ra·aha.
Uandake U Tirot Sing-ni itihasko nipilatenba, Shri Kharkongor, chadamberangko sandianiko dake itihasko ripinge rakkina digital-o kam ka·chinga didianiko on·aha. Jedakode mikkangchi an·chingni dedrang-su·drang, U Tirot sawa ong·achim ua maina janggitangko on·chakaha ba uandakgipa itihasko u·ie ra·na man·gen ine didianiko on·aha.
