SHILLONG: Mijal Sombar salni bako Meghalaya Cabinet-ni tom·aniko ong·atanio Meghalaya Youth Policy 2021-ko ra·chake on·angjolaha.
Ia Meghalaya Youth Policy-ko a·dokni Sports & Youth Affairs department, a·dokni chadamberangna an·tangtangni changa sapanirangchi janggi tangani cholrangko on·na aro bilsi 10-ni gisepon Meghalaya a·dokkoba GSDP per capita aro SDG ranking-o tang·dobatsranggipa dam 10 a·dokrangoni damsa ong·atna sorkarini miksonganirang dongengani gimin segatahachim.
Meghalaya a·doko chadamberangko lekka poranio, an·seng baljokanio, agan-ku·pattie on·anio, kamrangko ka·e cha·anio aro bading chiwalanio, kal·susaanio, jatni dakbewal rikbewal aro jakni kamrango, dingtang dingtang kamrango bak ra·paanio aro dilgipa ong·anio, samtangtango ong·telaigiparangna simsak nirokanio kamrangko namdapatna miksongani gnang sorkari ia Youth Policy-ko ra·gatahachim aro uandaken ia policy ba niamrangko Sombar salo Cabinet ra·chake on·angaha.
“Ia gital chasongo chadamberangan India a·songoba pilak kamrangkon jako ra·e ka·engahani gimin Meghalaya a·dokoba pilak chadamberangnan apsan cholrangko on·e a·doko pilakni gitan dingtanganiko ra·bana miksonganio Meghalaya sorkari ia Youth Policy-ko a·bachengatenga,” ine Cabinet tom·a matchotani ja·mano a·dokni Chief Minister Conrad K Sangma, kobor ra·timgiparangna parakataha.
Apsan daken, a·dokni Sports & Youth Affairs Minister Banteidor Lyngdoh-ba ia Youth Policy-ni gimin talataniko on·angengon, ia Youth Policy-ara chadamberangni dingtang dingtang neng·nikani aro ra·bianirangko chel·chake, chadamberangni changa sapanio pangchake janggi tangani cholrangko on·na gita sorkarini ra·gate on·enggipa niamrang ong·a ine parakataha.
