SHILLONG: Re·anggipa Sombar salo, Nongpoh-ni MLA Mayralborn Syiem aro MDC Balajied Ranee, Meghalaya a·dokni Chief Minister Conrad K Sangma-ko grongenba, Ri Bhoi a·jani ning·o donggipa Umden songko gital C&RD Block songchina didie memorandum-ko on·angjolaha.
Ia dilgipa sakgnini Chief Minister-ko grongani somoio janapani gitade, Ri Bhoi a·jao Umling C&RD Block-ara gitchambatsranggipa aro dal·begipa block ong·e bang·bata songrangkon name nirokna man·jaengani gimin Umden songoba C&RD block-ko songna nangengachim.
“Umling C&RD Block-ni ning·o dam 226 songrang gnang aro ia songrango komibeoba ge 15,000 nokdangrang donga. Uni gimin pilakni gitan nigope Umden songkoba block songani ong·engaha,” ine Nongpoh-ni MLA aro MDC, a·dokni Chief Minister Conrad Sangma aro C&RD Minister Hamletson Dohling-na sedoatgipa memorandum-o parakataha.
Nongpoh-Umden-Sonapur ramako tarie on·china gitaba Nongpoh-ni MLA aro MDC, dingtangmancha a·dok sorkarina sedoatgipa chittio janapatjolaha.