TURA: North Garo Hills a·jani Wageasi songo aro Wageasi bazar jolrango COVID-19-ko man·giparang dongahani gimin ia jolrangko re·anggipa Sombar saloni a·bachenge Bristibar salona containment zone dakataha ine North Garo Hills a·jani Deputy Commissioner u·iataha.
Deputy Commissioner-ni u·iatani gitade, ia songko containment zone dakengmiting somoio gipin biaprangoni manderangko ia biap ning·o napna on·jawa aro ia biaprango dongenggipa manderangba ia biaponi gipin biaprangchi ong·katna man·jawa.
Ia jolrango songdongenggipa manderangko noktangtangon nape dongchina gitaba Deputy Commissioner u·iataha.
Ia songko containment zone dakengmiting somoio ia jolrango jinma tom·bimonganirangko aro uandakgipa maming program-rangko ong·atna man·jawa ineba ua u·iataha.
Ia jolo donggipa dokkanrangko chipe dontokna gita nanggen aro manderangna nangchongmotgipa bosturangko ia jolko nirokna donenggipa supervising officer-ni songe on·gipa dolrang, sokate on·skagen.
