SHILLONG: Batanggimin konta 24-ni gisepo Meghalaya a·doko sak 558 manderang COVId-19 sabisiko man·daptaiaha, jeon sak 375 manderang a·dokni dingtang dingtang biaprango nampilskaaha aro apsan somoini bakon sakdok manderang siangtaiaha.
Mijal salni bako 558 COVID man·dapgiparangoni East Khasi Hills-o sak 192, West Garo Hills-o sak 140, Ri-Bhoio sak 62, West Khasi Hills-o sak 44, South West Khasi Hills-o sak 24, West Jaintia Hills-o sak 22, South Garo Hills-o sak 22, North Garo Hills-o sak 15, East Garo Hills-o sak 14, East Jaintia Hills-o sak 12 aro South West Garo Hills-o sak 11 COVID sabisiko man·dapaha.
Indake mijal salni bako sak 375 manderangba A·dokni dingtang biaprango COVID sabisioni nampiltokaha, uamangoni East Khasi Hills-o sak 89, West Garo Hills-o sak 70, Ri-Bhoio sak 65, West Jaintia Hills-o sak 62, North Garo Hills-o sak 29, West Khasi Hills-o sak 15, South West Garo Hills-o sak 12, South Garo Hills-o sak 11, South West Khasi Hills-o sak 9, East Jaintia Hills-o sak 8 aro East Garo Hills-oni sak 5 manderang sabisioni nampilaha.
Indake batanggimin konta 24-ni gisepo Meghalayao sak 6 manderang COVID sabisio siangtaiaha, uamangoni East Khasi Hills-o sak 4, Ri-Bhoio saksa aro West Jaintia Hills-osaksa.
Meghalaya a·doko COVID sabisiko man·giparang mijalona sak 58,833 gapaha, uamangoni sak 53,638 manderang COVID-oni nampiltokaha, sak 974 manderang sabisio uamangni janggirangko gimaataha, COVID sabisiko man·giparang a·doko da·o sak 4,221 gaptaiaha.
