A·dok damgnini simao meligrikgijaniko agangrikna Assam-ni CM re·baa

SHILLONG: Meghalaya aro Assam a·dokni simarango meligrikna man·gijaniko chief minister-ni gadango Meghalaya a·dokni Chief Minister Conrad K Sangma baksa agangrikna gita Sukrobar salo, Assam a·dokni Chief Minister Himanta Biswa Sarma, Shillong songjinmaona sokbaaha.
Assam aro Meghalaya a·dokni simarango meligrikgijanirangko namatna gita Meghalaya sorkari rakbee kamrangko ka·engoba, bilsi 49 ong·pile meligrikna man·gijaniko namatpilna gita maming cholrangko man·teljaengachim ine nikna man·a.
Indake ong·engon, da·o dipet ia neng·nikanirangko namatpilna gita official-rangni gadango agangrikanirang dongtaikujaengoba Assam aro Meghalaya a·dokko dilenggiparangni gisepo meli nangrimanirang dongskaengani gimin da·o iani bidingo agangrikna namgipa somoi ong·engaha ine adita salrangna skangsan, Meghalaya a·dokni Chief Minister Conrad Sangma, kobor ra·timgiparangna parakatahachim.
Apsan daken Assam a·dokni Chief Minister Himanta Biswa Sarma-ba, Meghalaya a·dokni Chief Minister baksa agangrikanichi, a·dok damgnini gisepo meligrikgijanirangko namatna man·gen ine Shillong-ona re·bana skang, Guwahati songjinmao, kobor ra·timgiparangna parakataha.
Sonibar salo, Union Home Minister Amit Shah, Shillong songjinmaona re·bae salgro salaram a·dokrangni chief minister-rangko grongna siengani gimin salgro salaram a·dokrangni dingtang dingtang chief minister-rangba Shillong-ona re·batokskaengaha.
Aug 6 tariko Guwahati-o agangriktaigen:
Unomitingo, Assam aro Meghalaya a·dokni simarango meligrikgijanirangko mijal Sukrobar salo a·dok damgnini chief minister-rang, Shillong-o tom·e agangrikangani ja·man da·o iani bidingo talbate aro nambate agangrikna gita a·dok damgnini chief minister-rang, re·baenggipa August jani 6 tariko Guwahati songjinmao tom·skagen ine u·iataha.
Shillong songjinmao Assam a·dokni Chief Minister Himanta Biswa Sarma aro Meghalaya a·dokni Chief Minister Conrad K Sangma, tom·e chanchirimangengon, a·dok damgnini gisepo meligrikgijanirangko namatenba, mikkangchi a·dok damgnini gisepo nangrime kamrangko ka·angna aro meli nangrime dongangna gitaba ku·rachakgrikangaha ine u·iataha.
A·dok damgnini simarango meligrikgijanirangko namatna man·na gita Shillong-ona re·bae agangrikahani gimin Meghalaya a·dokni Chief Minister Conrad Sangma-ba, Assam-ni Chief Minister Himanta Biswa Sarma-ko mittelpilangaha.
“A·dok damgnini gisepo meligrikgijanirangko namatna gita indita somoirangni gisepo dilgiparang maming agangrikanirang dongjahani a·selba simarango meligrikgijanirangko aro so·sojengjeng ong·anirangkoba nikna nangaha. Ia meligrikgijaniko namatna gita Assam-ni Chief Minister, an·tangni gisik nanganiko mesokaha aro mikkangchi a·dok damgnian ia meligrikgijaniko namatna gita ku·rachakgrikaha,” ine Sangma parakataha.
Ia meligrikgijaniko changsa agangrikaianichide namatna man·jawa indiba joltangtango ong·enga obostarangko aro chengoni see rakkianirangko nienba changni chang apsan chanchirimanichisa namatna man·gen ineba Meghalaya a·dokni Chief Minister parakataha.
Indake ong·engon, Assam aro Meghalaya a·dokni simarango meligrikgijanirangko Union Home Minister Amit Shah-ba namatna nangnikenga aro ua Sonibar salon Shillong-ona re·baengani gimin ua iani bidingo a·dok damgnini chief minister-rang baksa agangrikanggen ineba Conrad Sangma parakataha.