GH-ni a·kawe jolrango niam gri napsrukaniko champengchina GSMC dabia

TURA: West Garo Hills a·jani a·kawe jolrango donggipa dingtang dingtang songrango, aro mongsongbate Rajabala Chibinang jolrango gipin biaprangoni napsrukbae songdong a·chaenggiparang batroroengaha ine Garoland State Movement Committee (GSMC) Phulbari regional unit parakatenba, iani bidingo ta·raken ja·kuko de·china Garo Hills Autonomous District Council (GHADC)-ni Deputy Chief Executive Membor Nikman Ch Marak-na sedoataha.
GSMC Phulbari regional unit-ni secretary Michael Sangma-ni parakatani gitade, 1987 bilsio chi banani somoionisa ia jolrango Assam-oni katnape songdong a·chaanirang batrorona a·bachengaha maina ua somoio chi banahani gimin Assam a·dokoni bang·a manderangan Garo Hills-ona katnapchengtokahachim indiba uni ja·man Garo Hills-o katnapgipa manderang, Meghalaya a·dokni electoral roll-rangoba biming segatna a·bachengaha aro MGNREGS-ni job card-rangkoba ra·e Garo Hills-o kamrangko ka·e cha·na a·bachengaha.
“Ia saliram a·kawe jolrangara Assam a·dokchi kadulako man·gipa biaprang ong·e da·o ia jol gimikon niam gri katnape songdonggiparangko nikna man·engaha. Gipin biaprangoni katnape songdong a·chatokenggipa biaprangara Rajabala-Chibinang jolrango donggipa Rajpur, Nagabandh (Phulbari), Rajabala-oni Batabari-ona dakanggipa rama dilmarang, Wadagokgre a·king aro uandakgipa biaprang ong·enga,” ine GSMC Phulbari unit-ni dilgipa talatangenba, ia biaprango niam gri napsrukbae songdong a·chaenggiparangni jelbra jelsuenganiko block development officer-ni see rakkiaonikon nikna man·enga ine parakataha.
West Garo Hills a·jani a·kawe jolrango Assam sorkarini gitaba niam gri napdrana jotton ka·engani a·selan badiaba badiaba jolrangode so·sojengjeng ong·anirangko nikna man·rongenga ineba GSMC Phulbari unit parakataha.
“Assam sorkarini ra·sekna jotton ka·enggipa biaprang ia jolo dam 24 biaprang donga aro iarangoni mongsonggiparangara Nagabandh (Phulbari), Barmanpara, Majhipara, Jinjiram chibima rikamo donggipa Solartek aro gipinrang ong·a,” ine GSMC Phulbari unit-ni general secretary talatangenba, ia jolrango da·o Assam sorkarisa, office, skul, dokkan aro police station-koba kuliaha aro GHADC-koba ia jolrango kajina gilna on·jaenga ine parakataha.