‘Containment Zone’-o ong·giparangna cha·ani bosturangko on·china BJP dabia

TURA: West Garo Hills a·jao aro mongsongbate Tura jillao COVID-19 man·giparang batroroengahani gimin bang·bata biaprangkon da·ororo district administration-ni gita ‘containment zone’ dakatna nangengahaon, ia containment zone-rango dongna nangenggipa manderang, noktangtangoni ong·katna man·jae cha·ani ringani gri ong·tokna nangenga ine Bharatiya Janata Party (BJP) Tura City District Committee (TCDC) parakatenba, containment zone-rango dongna nangenggipa nokdangrangna nangchongmotgipa bosturangko aro mongsongbate cha·ani ringani bosturangko indin suale on·china district administration-ko didiangaha.
“COVID-19 man·gipa biaprangko chipe donataniara nama beben, indiba chipe donako man·enggipa nokdangrangna maming dakchakanirangko on·gija donaniara namen kragijani ong·a. Containment zone dakatako man·gipa biaprango bang·a nokdangrangan cha·ani ringani gri ong·e neng·nikanirangko man·tokna nangenga, uni gimin iandakgipa nokdangrangna district administration, cha·ani ringani bosturangko indin suale on·na nangchongmota,” ine BJP-TCDC-ni general secretary Wilver Greham M Danggo parakataha.
COVID-19-ni batrikrikaniko champengna gita tikarangko su·e ra·na nangchongmotenga ine janapatengon, iani bidingo a·dok sorkari aro district administration-ni gita bilaken manderangna u·iataniko on·na nangenga ine Wilver parakataha.
Meghalaya a·doko COVID-ni giproroaniko champengna a·dok sorkari, gong krorni kror tangkarangko jakkalaha indiba West Garo Hills a·jao da·onan kangal cholgrirangna aro neng·nikanirangko man·enggipa manderangna maming bosturangko suale on·ani dongkujaenga ineba BJP-TCDC-ni general secretary matnangatenba, iani bidingo BJP-TCDC, sorkarini kamko nirikkienba, ma·mongo BJP dolchi dilenggipa NDA sorkarina u·iatskagen ine parakataha.