AMPATI: Ja·manchake koborko man·soani gitade, mni Sukrobar salo Self Help Group Cluster Meet for Livelihood Promotion aro Awareness, Covid Vaccination-cum-Vaccination Drive-ko South West Garo Hills-ni Betasing-o ong·atangaha.
Block Mission Management Unit (BMMU), Betasing-o Health Department aro MGNREGA-ni gita program ong·atgipao sak 80 covid tika su·na kragipa manderangko tika su·angjolaha.
AH & VO Betasing Block-ni Dr Nokman A Sangma, MSRLS aro SHG-ni program-o jinmana aganprakengon, iandakgipa dingtang dingtang program-ko ong·atanichi an·chingni songsalo sabisini obostarangoniko champengna miksonganiko chu·sokatgen.
Uni aganani gitade, jolo donggipa manderangni silroro-namrorona miksonge kamko ka·enggipa SHG-rangni miksongani chu·sokatna re·mikkanganiba ong·enga.
Dr. jean wak, do·o aro gipin matburingko jila-kaanio nirok-simsakchina seokahachim, ua an·tangni ama-dipet a·jani SHG-rangna dakchakpana gisikni skaniko parakaha.
Medical aro Health Officer, Betasing PHC, Dr Sandip Ch Sangma, mni salo tom·anio Covid sabisini bidingo manderangna agan-taldapate on·aha. Ua da·ororo bilsi 18 aro 45 gapgiparangna covid tikako su·ani namgnirangko agan-talate on·an baksa darangkoba tika su·na chakchikjachina didiangaha.
Uandake, covid sabisina tika su·anio darangba ong·gija dake sakgipina jangatjachina aro tika su·na chakchike rojachina gitaba didiangaha. Apsandake, saoba covid-na tika su·ani bidingo maiba jajaani donggenchimode SHG-rango sing·e ra·china ine didiangjolaha.
