SHILLONG: ILP-ni gimin gronge agangrikna Ma·mong Home Minister Amit Shah-ni a·dokona re·baako ka·oksie nichaksoenggipa pressure group-rang changsatai ianchangoba namen gisik suk ong·toktaijaha, jeon uamangni dabienggipako chu·sokatna gita HM namedakede ku·chakangjaha.
Pressure group-rangni aganako Home Minister minit 25-30 mangna knatimaha, indiba jensomoio KSU president, Lambok Marngar aro CoMSO chairman, Robertjune Kharjahrin mang ILP-na dabigipani bidingo janapon gipin chanchiani dongjaode chanchianiko dontongainajok ine Ma·mong Home Minister, Amit Shah aganaiahachim.
Indake Home Minister kattarangna chinga suk ong·jaha aroba chanchirimani bite gnanggipa ong·jaha ine KSU president, Lambok Marngar aro CoMSO Chairman, Robertjune Kharjahrin mang koborni manderang aganaha.
Unomitingo dabianirangko niatgen ine Chief Minister, Conrad Sangma pressure group-rangna aganaha jean tom·anio dongpaachim, indakoba ia kattarang HM-ni ku·sikoni ong·katjani gimin CoMSO dilgipa suk ong·gijaniko parakaha.
Indake ong·genchimoba ILP-na dabianiko dontongjawa, ILP be·en pil·jaskal bilakgen dabiangkugen ine presure group dilgiparang aganaha.
