SHILLONG: Sonibar saloni Robibar salona konta 24-ni gisepo Meghalaya a·dok gimiko sak 10 manderang COVID-19 man·e siangtaiaha aro ia apsan salon sak 597 manderang, a·dokni dingtang dingtang biaprango COVID man·dapaha.
Robibar salo COVID-19 man·dapgipa sak 597 manderangko channe da·o Meghalaya a·dok gimiko COVID-19 man·e dongenggiparang gimik sak 5007 gapengaha aro ia apsan salon mande sak 10 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1024 gapskaengaha.
Robibar salo positive ong·gipa sak 597 manderangoni sak 17-de East Garo Hills-o, sak 13-de East Jaintia Hills-o, sak 242-de East Khasi Hills-o, sak 18-de North Garo Hills-o, sak 54-de Ri Bhoi a·jao, sak 9-de South Garo Hills-o, sak 8-de South West Garo Hills-o, sak 18-de South West Khasi Hills-o, sak 105-de West Garo Hills-o, sak 13-de West Khasi Hills-o aro sak 62-de West Jaintia Hills a·jao ong·a.
Konta 24-ni gisepo COVID man·e sianggipa sak 10 manderangoni sak 5-de East Khasi Hills-o, sak 3-de West Garo Hills-o, sak 1-de South Garo Hills-o aro sak 1-de West Jaintia Hills a·jaoni ong·a.
Ia apsan salon gimik sak 288 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 55,163 gapskaengaha.
