TURA: Sajinmani somoio kangal cholgrirangna ma·mong sorkarini on·atenggipa Pradhan Mantri Garib Kalyan Anna Yojana (PMGKAY)-ni merongko Diwali-ona kingking on·na nanga ine Garo Hills-ni BJP dol dabiangaha.
Meghalaya a·doko PMGKAY-ni kamrangko nirokna dongimin Tura-ni BJP MDC Bernard N Marak-ni parakatani gitade, ia sal somoirango COVID-19-ko warachakna lockdown-rangko ra·gatenganichi manderang aro mongsongbate kangal cholgrirang neng·nikanirangko chagrongna nangtokengani gimin BJP dol, kangal cholgrirangna ma·mong sorkarini on·atenggipa cha·ani bosturangko sokate on·na nangnikenga.
“Ia sajinmani somoio ramram manderang maming janggi tangani cholrang dongjae neng·nikanirangko chagrongna nangtokenga. Kangal cholgrirang maming janggi tangani cholrang dongjaengoba, loan-rangde pangna kattironga gitan kattienga, dokkan pararangkoba gamna nangenga aro skul/college-rangchi fee-rangkoba gamna nangtokenga. Me·chik dolrangni gong 500/- ka·e man·na nangenggipa tangkarangkoba man·tokjaenga,” ine Marak parakatenba, PMGKAY-ara kangal cholgrirangna cha·ani bosturangko on·na gita ra·gatgimin scheme ong·ani gimin cha·ani bosturangko somoi gita manderangna sokate on·na nanga ine didiangaha.
Tura MDC-ni parakatani gitade, Robibar attamo BJP-ni dilgiparang, ma·mongni dilgiparang baksa PMGKAY-ni bidingo chanchirimangenba, PMGKAY-ni ning·o on·enggipa kg 5-ni merongko Diwali-ona kingkingan man·tokna nanga ine tik ka·angaha.
Indake ong·engon, kangal cholgrirangna miksonge on·atenggipa scheme-rangko ja·manchakata gri kangal cholgrirangna sokate on·china gitaba BJP-ni dilgiparang, a·dokni Chief Minister Conrad K Sangma-ko didiataha.