SHILLONG: Meghalaya a·doko hajira ka·e cha·enggiparangna sorkarini ku·rachakgimin tangka paisarangko on·china dabie Thma U Rangli-Juki (TUR)-ni dilgipa Angela Rangad, batanggimin July 19 tarikonin Main Secretariat mikkango asonge jingjengatengon, uni Secretariat mikkango asonge jingjengataniko dontongchina aro ia biapko wate on·china didie, East Khasi Hills a·jani Deputy Commissioner Isawanda Laloo una seataha.
Meghalaya a·doko hajira ka·e cha·enggipa aro salsana kamaie cha·enggipa manderangna sorkari re·anggipa bilsion gong 2100 tangkarangko dakchake on·na ku·rachakahachim indiba ia tangkarangko da·onan sorkari on·kujaenga ine re·anggipa July 19 tarikonin TUR-ni dilgipa, Secretariat mikkango asonge jingjengatengachim.
Indake ong·engon, Main Secretariat ramao ba ning·o iandake jingjengatanirangko dakna niam dongja ine East Khasi Hills a·jani Deputy Commissioner talatangenba, ia biapo jingjengataniko dontonge ia biapko wate on·china TUR-ni dilgipa Angela Rangad-ko didiataha.
Rangad-ni badi ka·enggipa kamni bidingo district administration, kosako donggipa official-rangna u·iatmanaha aro iani bidingo Labour department kamrangko ka·engaha ineba East Khasi Hills a·jani Deputy Commissioner parakataha.
Indake ong·genchimoba, Deputy Commissioner aro sorkarini mol·molaniko knachakna gita TUR-ni dilgipa jechakskaaha aro sorkarini ku·rachakgimin tangka paisarangko on·kujaskal ia biapko wate on·jawa ine parakatskaaha.