SHILLONG: Ru·uta salrangna jera ra·grikanio neng·nikgipa Assam aro Meghalaya a·dok damgni sima-arini bidingo chanchirimaniko a·bachengaha, indake da·o a·dok sorkari ge·gittam regional committee-ko songna gita manchiaha. Chanchirimanio ia ge·gittam songgimin committee-rang a·dok damgnini gisepo donggipa sima-arini obostarangni gimin a·dok sorkarina u·iataniko dakgen.
Mnisalo mangmang Assam aro Meghalaya a·dok damgnini Chief Minister sakgni a·dok damgnini gisepo dongenggipa sima-ari mamlani bidingo chanchirime nama manchianiona ra·bana gita golpogrikani ja·man manchianiko dakaha.
Kobor ra·timgiparangna Chief Minister Conrad Sangma-ni mijalo aganani gitade, Union Home Minister Amit Shah aro Northeast-ni gimik Chief Minister-rangni chanchirimaniko dakmitingo sima-arirango nanggrikani bidingoba chanchirimangaha.
Chief Minister, Conrad Sangma, Assam aro Union Home Minister Amit Shah baksa chanchirimaniko dakmitingo manchianirangko mijalo Cabinet Minister-rangna talate on·aha.
“Apsan somoio, West Khasi Hills, Ri Bhoi aro East aro West Jaintia Hills district ge·brina ge·gittam regional committee-rangko songe on·na gita manchiaha,” ine Conrad Sangma aganaha.
Indake, Regional Committee-ko Cabinet Minister-rang dilgen aro unbaksa MLA, MDC aro adita daito ra·gipa manderang membor ong·gen.
Sima-arirango nanggrika aro je obostani mamlarangni gimin Committee, daito ra·enggipa manderang baksa chanchirime a·damona wenange report-rangko tarie a·dok sorkarina watgen.
Chief Minister-ni aganani gitade jensalo ia kamrang a·bachengnok, unode ua adita daito ra·nasienggipa manderang baksa chanchirimaniko dake political party, Autonomous District Council, Headmen, CEM aro songsalni daito ra·gipa manderang baksa dal·bate chanchirimaniko dakna man·a gita state level committee-koba songgen,
Union Minister Amit Shah, a·dokona re·bae Northeast-ni gipin a·dokrangko donchange Assam aro Meghalaya a·dok damgnini gisepo sima-arini bidingo nanggrikaniko re·baenggipa bilsio 75-gipa Independence Day-ko manina skang ta·rake dolgni a·songe nama manchianiko dakchina gita didiangaha.
A·dokni CM Conrad Sangma aro Assam-ni CM Himanta Biswa Sarma-mangni skanggipa gadango chanchirimaniko Shillong-o ong·ataha, indake gnigipa gadangna chanchirimaniko August 6 tariko Guwahati-o chanchirimaniko dakgen.
