TURA: Garobadha jolrango ringani chirangko chu·onga gita man·jae jolo songdongenggipa manderang neng·nikanirangko chagrongna nangtokenga ine Garo Students Union (GSU) Garobadha regional unit, a·dokni PHE Minister Renikton Lyngdoh Tongkhar-na sedoataha.
PHE Minister-na sedoatgipa chittio GSU-ni parakatani gitade, Garobadha jolo songdongenggipa manderang batroroengahani gimin ringani chirangko chu·onga gita man·tokjaengahachim.
“Skangode Garobadha-o 90 HP water pump-kosa jakkalachim indiba da·ode ia water pump-ni biapo 75 HP pump-kosa tekskaaha aro iani a·selan chirangko chu·onga gita man·jaengaha,” ine GSU Garobadha unit-ni general secretary parakatenba, Garobadha-o 100 HP water pump-ko teke on·china PHE Minister-ko didiataha.
Greater Garobadha Water Supply Scheme (GGWSS)-ko ta·rake matchotate on·china gitaba GSU Garobadha unit dabiangaha.
Re·anggipa June jaosan a·dokni PHE Minister Renikton Tongkhar, ia Greater Garobadha Water Supply Scheme-ko nie ra·angahachim aro ia scheme-ni kamrangko matchotahaode Garobadha jolo donggipa dam 96 songrangna chirangko chu·onga gita on·na man·gnok ine parakangahachim.
Kamrangko adita jarangna skangsan a·bachengataoba 50 percent-ni gitade kamrang matchotmanaha aro re·baenggipa 2022 bilsini December jaode chirangko nokantionan sale on·na man·na gita ia kamrangko somoi gita matchotatchina gita ua contractor-rangkoba didiangahachim.