SHILLONG: Sombar saloni Mongolbar salona konta 24-ni gisepo Meghalaya a·dok gimiko sak 710 manderang COVID-19-ko man·daptaiaha aro apsan somoion sak 9 manderang COVID man·e siangdapaha.
Mongolbar salo COVID-19 man·dapgipa sak 710 manderangko channe da·o Meghalaya a·dok gimiko COVID-19 man·e dongenggiparang gimik sak 5332 gapengaha aro ia apsan salon mande sak 9 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1040 gapskaengaha.
Mongolbar salo positive ong·gipa sak 710 manderangoni sak 16-de East Garo Hills-o, sak 45-de East Jaintia Hills-o, sak 330-de East Khasi Hills-o, sak 11-de North Garo Hills-o, sak 66-de Ri Bhoi a·jao, sak 11-de South Garo Hills-o, sak 5-de South West Garo Hills-o, sak 17-de South West Khasi Hills-o, sak 109-de West Garo Hills-o, sak 42-de West Khasi Hills-o aro sak 58-de West Jaintia Hills a·jao ong·a.
Konta 24-ni gisepo COVID man·e sianggipa sak 9 manderangara sak 5-de East Khasi Hills-o, sak 2-de Ri Bhoi a·jao, sak 1-de West Garo Hills-o aro saksade West Khasi Hills a·jao ong·a.
Ia apsan salon gimik sak 453 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 56,101 gapskaengaha.
Meghalaya a·doko COVID sabisiko man·giparang mijalona sak 62,473 gapangaha, uamangoni sak 56,101 sabisioni nampilaha, sak 1,040 siangaha aro COVID man·e donggiparang da·o sak 5,332-ona tang·doangaha.
