TURA: Ia sal somoirango COVID-19 giproroengani gimin skulrangko chipe dontokengani a·sel chatro chatrirang aro mongsongbate songadam nokadamrango poraienggipa bi·sarang neng·nikanirangko chagrongna nangtokengahani gimin a·doko skul, college, university aro gilja nokrangkoba COVID-ko warachakna dongimin niamrango pangchake kuliatpiltaichina gita Garoland State Movement Committee (GSMC) Pedaldoba regional unit, a·dok sorkariko didiataha.
GSMC Pedaldoba unit-ni chairman Rimjen Ch Sangma-ni parakatani gitade, COVID-19-ni batrikrikaniko champengna gita skulrangko chipate class-rangko internet gita ra·skaengoba, songadam nokadamrangode internet-rangko man·jaengani gimin bang·bata chatro chatrirangan an·tangtangni class-rangko ra·pana man·jaenga indiba skul fee-rangkode jaantian gamna nangskatokengachim.
“Skulrango aro mongsongbate private skulrango skigiparangna skul fee-rangonikosa dormaharangko on·skaengani gimin skulrango class-rangko ra·jaengoba chatro chatrirang, an·tangtangni skul fee-rangko jaantian gamna nangtokenga aro internet gita class-rangko ra·engoba songadam nokadamrangode network-rangko name man·tokpajani gimin chatro chatrirang an·tangtangni class-rangko ra·na man·jaenga,” ine GSMC Pedaldoba unit-ni chairman, suk ong·gijaniko parakatenba, COVID-ko warachakna dongimin niamrango pangchake skul, college aro pilak university-rangko kuliatpiltaichina gita a·dok sorkariko didiataha.