SHILLONG: South West Khasi Hills a·jani Jashiar songo gital rikgipa ‘footbridge’ ba ja·achi re·ani dolongko mijal Budbar salo, Meghalaya a·dokni Chief Minister Conrad K Sangma aro a·dokni PHE Minister Renikton Lyngdoh Tongkhar, oprake on·angaha.
Ia dolongko Nongbah, Marshillong aro Jashiar songni Village Employment Council (VEC)-rang, Mahatma Gandhi National Rural Employment Guarantee Scheme (MGNREGS)-ni ning·o rikaha aro ia dolongko songni VEC-rang jagittamni gisepo matchotataha ine u·iataha.
Ia metre 53 ong·e bakrogipa dolongko oprake on·angani somoio a·dokni Chief Minister jinmana aganprakengon, Meghalaya a·dokara chonbegipa a·doksan ong·genchimoba MGNREGS-ni kamrango chu·sokgipa ong·enganina mingsingako man·gipa a·dok ong·a aro uandaken ia bilsini gisepo ma·mong sorkari, MGNREGS-ni kamrangna gong kror 1600-na baten Meghalaya a·dokna chamataha ine parakangaha.
Chief Minister-ni aganani gitade, Assam gita dakgipa dal·dalgipa a·dokrangna baten Meghalaya a·dokna MGNREGS-ni ning·o tangka paisarangko bang·bate chamataha.