TURA: Re·anggipa Mongolbar attamo, North Garo Hills-oni East Garo Hills a·jaona dakanggipa National Highway (NH-62) rama gita re·ruraenggipa garirangko, ma·sina man·gijagipa dolni manderang dakait dakaha ine kobor on·aha.
Koborko on·ani gitade, ia manderang, silchidarerangko ra·bitenba, North Garo Hills a·jani Wageasi aro East Garo Hills a·jani Rongmil gisepgriko, garirangko champengsoenba dakait dakaha.
Ia manderang, Williamnagar-chipak re·angenggipa gari bolgniko ramao champengsoaha aro gari bolsaoniko gong 50,000-mangni gita ra·seke ra·angaha.
Dakait daka man·gipa gari bolgnioni bolsade ua biaponi kate jokangna man·aha aro ja·mano Rongjeng-ona re·ange police-rangna kobor on·eaha.
Police-rang bakan ja·mano ua biapona re·angaha ine kobor on·aha.
Batanggimin bilsirangoba ia biap damgnini gisepgriko ma·sina man·gijagipa manderang, rama gita re·ruraenggipa garirangoniko ra·seke ra·ahachim ine nikna man·a.
