SHILLONG: Adita salrangna skang, Assam aro Mizoram a·dokni sima jolo dolgni dinggrikanichi baditaba sak manderang sina nangahani gimin aro bang·bea manderang saknaanirangko man·na nangahani gimin North East Students Organisation (NESO) suk ong·gijaniko parakatenba, mikkangchi salgro salaram a·dokrangni gisepo meli nangrime dongangna man·na gita a·dok damgnini gisepo meligrikgijanirangko ta·raken namatchina gita salgro salaramni pilak a·dok sorkarirangkon didiangaha.
Ia NESO-o Khasi Students Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) and All Arunachal Pradesh Students’ Union (AAPSU) dolrang bak ong·paengachim ine nikna man·a.
NESO-ni parakatani gitade, a·dok damgnini gisepo iandake so·sojengjeng ong·ani aro dinggrikaniranga salgro salaram a·dokrangni meli nangrime donganiko pe·ani gita ong·enga aro ian salgro salaram a·dokrango namroro silroroaniko champengani gitaba ong·enga.
“Adita salrangna skang a·dok damgnini gisepo dingggrikaniara salgro salaram jol gimikon so·sojengjeng ong·aniko aro manderangni gisiko dongtogijaniko ra·baani gita ong·aha. A·dok damgnini gisepo iandake dinggrikanirangara sima ari jolrango songdongenggipa manderangna kenchakna nanganiko ra·baani gitaba ong·a,” ine NESO parakataha.
Batanggimin somoirangoba Assam-Meghalaya, Assam-Nagaland aro Assam-Arunachal Pradesh a·dokrangni gisepo apsan daken so·sojengjeng ong·anirangko nikna man·aha aro iandakgipa so·sojengjeng ong·aniranga sima ari jolrango songdongenggipa manderangni saknaanirangko chakna nangrongenganiko mesokani ong·enga ineba NESO parakataha.
“2010 bilsio Assam aro Meghalaya a·dokni simao dinggrikanichi bang·a manderangan janggitangtangko gimaatna nangaha aro Assam-Nagaland baksana Assam-Arunachal Pradesh a·dokrangni gisepoba apsan dakgipa obostarangko nikna man·rongenga,” ine NESO-ni dilgiparang parakataha.
Iandake a·dok damgnini gisepo meligrikgijanirangko ta·raken namatchina gitaba NESO, a·dok sorkarirangko didiangaha aro a·dok damgnini agangrikanio ma·mong sorkarikoba dongpae dakchakaniko on·china didiangaha.