SHILLONG: Meghalaya a·doko COVID man·e sianggiparang batroroengahani gimin an·tangtangko naljoke rakkina man·na gita ta·raken COVID-ni tikarangko su·e ra·china Mawhati-ni MLA Dasakhiat Lamare, a·doko songdongenggipa manderangko didiataha.
Meghalaya a·dokni bang·bata biaprangon manderang Covid-ni tikako su·na kentokengani a·sel ra·biani obostarang namjabatroroengaha aro uni constituency-oba apsan obostakon chagrongna nangenga ineba ua aganaha.
Mawhati MLA-ni parakatani gitade, ua an·tangba ia antini gisepon gnigipa tikako su·e ra·na sienga aro ua somoio ua an·tangni constituency-ni manderangko su·e ra·china didina gita songni nokni dilgiparang baksa chanchirimna sienga.
Manderang toromni gita bebera·anirangchi aro tol·e jangbingbangenggipa kattarangko bebera·e COVID-ni tikarangko su·na kentokenga ineba Lamare parakataha.
“Manderangni gisiko ong·gija dakgipa chanchianirang sokbarongani a·sel tikarangko su·na kentokenga. Aadhar-na biming segatanioba bang·bata manderangan ong·gija dakgipa bebera·anirangchi bimingtangtangko segatna siktokjaenga aro apsan daken ia tikako su·anioba manderang kentokenga,” ine ua aganaha.
Manderangko naljoke rakkina gitasa tikarangko su·enga ine talataniko on·angengon, ia tikani bidingo manderangna tol·e jangbingbangatanirangko dakjachina gitaba Mawhati MLA mikrakataha.