SHILLONG: Meghalaya Cabinet-o rimnapako man·gipa gital Minister aro BJP MLA Sanbor Shullai-na Bristibar salo, a·dok sorkari portfolio-rangko suale on·angaha.
Koborko on·ani gitade, gital Cabinet Minister-na Animal Husbandry & Veterinary department, Arts & Culture, Home (Passport), Prisons aro Labour department-rangko sorkari on·angaha.
Re·anggipa July-ni 27 tariko BJP-ni gitcham Minister AL Hek-ko Cabinet-oniko ra·galenba uni biapo, BJP-ni sakgipin MLA Sanbor Shullai-ko Cabinet-o rimnapskaahachim.
Indake ong·engon, AL Hek-ni jako ra·gipa Health & Family Welfare department-ko a·dokni Deputy Chief Minister Prestone Tynsong-na on·skaaha aro ia department baksana a·dokni Deputy Chief Minister, uni skango jako ra·soenggipa gipin department-rang, chong·motan Housing, Parliamentary Affairs, Public Works Department (Roads), Food, Civil Supplies & Consumer Affairs baksana Cooperation department-rangkoba jako ra·angkugen.
Koborko on·ani gitade, a·dokni Chief Minister Conrad K Sangma-ni ge·etaniko man·enba sorkari, ia portfolio-rangko minister sakgnina sualataha.
