SHILLONG: A·doko da·omiting COVID sabisi sajinmani somoio aro sabisirang bang·rikrikengo, Health Department-an mongsongbatgipa ong·enga, unigisepon Minister-ko jujaatanio maming neng·nikani sokbajawama, namaigenma ine sing·anirang sokenga ine a·gipi Congress dilgipa Ampareen Lyngdoh aganaha.
Health department-ko Prestone Tynsong-ni jako on·aha, indake minister dingtangode pilak kam ka·anirangan dingtang ong·aijok, unigisepon ia rakbegipa somoio indakgipa dingtangataniara health department-na nangchakeani dongjawama ineba ua agan-janapaha.
Hek-ko Cabinet-oniko ra·galani bidingo aganengon, ian sorkarini kosako sin·jetani gnanganiko sakki on·enga ineba Ma Lyngdoh aganaha.
“AL Hek aro uni cabinet ka·rimskarangni gisepo meligrikgijanirang donga’’ ine chinga nika, Congress dilgipa aganaha.
Haida Home Minister Amit Shah-ni a·dokona wenbamitingon iarangko dake donangahakon ineba chinga chanchiatmana, maina ua ILP gita dakgipa mongsonggipa nanganirangni giminan chanchiangpiljaha ine aganan baksa Sanbor Shullai gita dakgipa gita gital minister-ara Labour department-o CRAWL scheme dakgiparangko jakkalna changgenma, Ma Lyngdoh aganaha.
Indake ong·engon, “mikkangchi mai ong·gen aro maikae re·mikkanggen, chinga pilakkon nirikkitgen,” Congress dilgipa aganaha.
